സുൽത്താൻ ബത്തേരിയുടെ പേര് മാറ്റണമെന്ന നിലപാടിലുറച്ച് കെ. സുരേന്ദ്രന്.
വയനാട്: സുൽത്താൻ ബത്തേരിയുടെ പേര് ഗണപതിവട്ടം എന്നാക്കണമെന്ന ആവശ്യത്തില് ഉറച്ച് വയനാട്ടിലെ എന്ഡിഎ സ്ഥാനാര്ത്ഥിയും ബിജെപി സംസ്ഥാന അധ്യക്ഷനുമായ കെ. സുരേന്ദ്രന്. വൈദേശിക ആധിപത്യത്തിൻ്റെ ഭാഗമായാണ് സുൽത്താൻ ബത്തേരി എന്ന പേര് വന്നതെന്നും പേര് മാറ്റം അനിവാര്യമെന്നും സുരേന്ദ്രന് പറഞ്ഞു.
അതേസമയം, സുരേന്ദ്രനെ വിമര്ശിച്ച് എല്ഡിഎഫും യുഡിഎഫും രംഗത്തെത്തി. താന് ജയിച്ചാല് സുല്ത്താന് ബത്തേരിയുടെ പേര് മാറ്റി ഗണപതിവട്ടം എന്നാക്കുമെന്ന് ഒരു ദേശീയ ചാനലിന് നല്കിയ അഭിമുഖത്തിലായിരുന്നു സുരേന്ദ്രന് പറഞ്ഞത്. ഇന്ന് താമരശേരിയില് നടത്തിയ വാര്ത്താസമ്മേളനത്തിലാണ് സുരേന്ദ്രന് നിലപാട് ആവര്ത്തിച്ചത്.
സുല്ത്താൻസ് ബത്തേരി അല്ല അത് ഗണപതിവട്ടമാണ്. അത് ആര്ക്കാണ് അറിയാത്തതെന്ന് സുരേന്ദ്രൻ ചോദിച്ചു. ടിപ്പു സുല്ത്താന്റെ അധിനിവേശം കഴിഞ്ഞിട്ട് എത്രകാലമായി. അതിന് മുമ്പ് എന്തായിരുന്നു പേരെന്ന് എല്ലാവര്ക്കും അറിയാമെന്നും സുരേന്ദ്രൻ പറഞ്ഞു.
വൈദേശിക ആധിപത്യത്തിന്റെ ഭാഗമായി വന്നതാണ് സുൽത്താൻ ബത്തേരി എന്ന പേര്. വിഷയം 1984ൽ പ്രമോദ് മഹാജൻ ഉന്നയിച്ചതാണെന്നും സുരേന്ദ്രൻ പറഞ്ഞു. ടിപ്പു സുല്ത്താൻ വരുന്നതിന് മുമ്പ് അങ്ങനെ ഒരു സ്ഥലമുണ്ടായിരുന്നില്ലേ? കോണ്ഗ്രസിനും എല്ഡിഎഫിനും അതിനെ സുല്ത്താൻ ബത്തേരി എന്ന് പറയുന്നതിനാണ് താല്പര്യം. അക്രമിയായ ഒരാളുടെ പേരില് ഇത്രയും നല്ലൊരു സ്ഥലം അറിയപ്പെടുന്നത് എന്തിനാണെന്ന ചോദ്യമാണ് താൻ ചോദിച്ചതെന്നും സുരേന്ദ്രൻ വ്യക്തമാക്കി.
0 Comments