വ്രതശുദ്ധിയുടെ പുണ്യവുമായി ഇന്ന് ചെറിയപെരുന്നാള്.
കോഴിക്കോട് : വ്രതശുദ്ധിയുടെ പുണ്യവുമായി ഇന്ന് ചെറിയപെരുന്നാള്. റംസാന് 29 പൂര്ത്തിയാക്കിയാണ് ഇത്തവണ വിശ്വാസികള് ഈദുള് ഫിത്തര് ആഘോഷിക്കുന്നത്.
പള്ളികളിലും ഈദ്ഗാഹുകളിലും നടക്കുന്ന പെരുന്നാള് നമസ്കാരങ്ങളില് ആയിരങ്ങള് പങ്കുചേരുന്നു. സ്നേഹത്തിന്റെ കൂടിച്ചേരലുകളുടേയും ആഘോഷം കൂടിയാണ് ചെറിയ പെരുന്നാള്. നന്മകളാല് സ്ഫുടം ചെയ്ത ആത്മീയ ഊര്ജ്ജവുമായിട്ടാണ് വിശ്വാസികള് ഇന്ന് ചെറിയ പെരുന്നാള് ആഘോഷിക്കുന്നത്. ക്ഷമ, സഹനം, കാരുണ്യം, തുടങ്ങിയ മൂല്യങ്ങളുടെ കൂടിച്ചേരല് കൂടിയായ വ്രതാനുഷ്ഠാന ദിനങ്ങള് പിന്നിട്ടാണ് വിശ്വാസികള് ചെറിയ പെരുന്നാളിന്റെ ആഘോഷങ്ങളിലേക്ക് കടക്കുന്നത്. ഇല്ലാത്തവന്റെ വിശപ്പറിയുന്നത് മാത്രമല്ല, വാക്കിലും പ്രവൃത്തിയിലും തെറ്റുകള് വരാതിരിക്കാനുള്ള ജാഗ്രത കൂടിയായിയരുന്നു കഴിഞ്ഞുപോയ 29 ദിനരാത്രങ്ങള്. സക്കാത്ത് നല്കി സമ്പത്ത് വിപുലീകരിച്ചും ഇഫ്താർ സംഗമത്തിലൂടെ സൗഹൃദം ഊട്ടിയുറപ്പിച്ചും കൈകളിൽ മൈലാഞ്ചിയണിഞ്ഞും പുതുവസ്ത്രങ്ങള് അണിഞ്ഞും സുഹൃത്തുക്കളെയും ബന്ധുക്കളെയും സന്ദര്ശിച്ചും ഇന്നത്തെ ദിവസം വിശ്വാസികള് സമ്പന്നമാക്കും. ഇന്നലെ ശവ്വാൽ പിറ മാനത്ത് തെളിഞ്ഞതോടെയാണ് വിശ്വാസികള് ചെറിയ പെരുന്നാള് ഒരുക്കങ്ങൾ തുടങ്ങിയത്.
0 Comments