കെഎസ്ആര്ടിസിയുടെ ബിസിനസ് ക്ലാസ് ബസ് ഉദ്ഘാടനം നടത്തിയെന്ന് മന്ത്രി.
കൊച്ചി: കെഎസ്ആര്ടിസിയുടെ ബിസിനസ് ക്ലാസ് ബസ് സര്വീസ് പ്രഖ്യാപിച്ച് ഗതാഗത മന്ത്രി കെ.ബി. ഗണേഷ്കുമാര്. പാൻട്രി, ടോയ്ലറ്റ് സൗകര്യങ്ങൾ ഉൾപ്പടെ ആധുനിക സൗകര്യങ്ങളോടെയുള്ള ബസ് ആയിരിക്കും സര്വീസ് നടത്തുകയെന്നും മന്ത്രി വ്യക്തമാക്കി. യാത്രക്കാര്ക്ക് ടിക്കറ്റ് റിസര്വ് ചെയ്യുന്നതിനൊപ്പം ഭക്ഷണവും ബുക്ക് ചെയ്യാനാകും. ഈ മാസം 15ഓടെ ബിസിനസ് ക്ലാസ് ബസ് എത്തുമെന്ന് മന്ത്രി വ്യക്തമാക്കി. എറണാകുളത്തെ നവീകരിച്ച കെഎസ്ആര്ടിസി ബസ് സ്റ്റാന്ഡിന്റെ ഉദ്ഘാടന വേദിയിലാണ് മന്ത്രിയുടെ പ്രഖ്യാപനം.
ബിസിനസ് ക്ലാസ് ബസ് സര്വീസുകളുടെ ഉദ്ഘാടനവും ഈ വേദിയിൽ നടന്നതായും മന്ത്രി പ്രഖ്യാപിച്ചു. തെരഞ്ഞെടുപ്പ് പെരുമാറ്റ ചട്ടം നിലവിൽ വന്നാൽ ഉദ്ഘാടനം പറ്റാത്തതിനാലാണ് ഇപ്പോള് ഉദ്ഘാടനം നടത്തുന്നതെന്നും മന്ത്രി പറഞ്ഞു. ബസ് വന്നാൽ താൻ ഓടിച്ച് നോക്കി സര്വീസ് ആരംഭിക്കും. തിരുവനന്തപുരം -കൊച്ചി റൂട്ടിലാകും ആദ്യ സര്വീസെന്നും ഗണേഷ്കുമാര് പറഞ്ഞു. വേദിയിൽ പ്രസംഗത്തിനിടെ ഹൈബി ഈഡൻ എംപി ഗണേഷ്കുമാറിനെ പ്രശംസിച്ചു. പറഞ്ഞാൽ പറഞ്ഞത് ചെയ്യുന്ന ആളാണ് മന്ത്രി ഗണേഷ്കുമാറെന്നും അതിന് ഉദാഹരണമാണ് കെഎസ്ആര്ടിസി ബസ് സ്റ്റാന്ഡിന്റെ നവീകരണമെന്നും മന്ത്രി കെഎസ്ആര്ടിസിയുടെ ഐശ്വര്യമായി നിലനിൽക്കട്ടെയെന്നും ഹൈബി ഈഡൻ പറഞ്ഞു.
0 Comments