കാരക്കസ്: വെനസ്വേലയെ നടുക്കിയ അതിശക്തമായ ഇരട്ട ഭൂചലനത്തിൽ മരണസംഖ്യ 1500 കടന്നു. ബുധനാഴ്ച റിക്ടർ സ്കെയിലിൽ 7.2ഉം 7.5ഉം തീവ്രത രേഖപ്പെടുത്തിയ ഭൂചലനങ്ങളിൽ അരലക്ഷത്തിലധികം (51,000) ആളുകളെയാണ് കാണാതായിരിക്കുന്നത്. കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടക്കുന്നവർക്കായുള്ള തിരച്ചിൽ നിർണ്ണായകമായ 72 മണിക്കൂർ പിന്നിടുമ്പോൾ, ഇനിയാരെയെങ്കിലും ജീവനോടെ പുറത്തെടുക്കാനാകുമെന്ന പ്രതീക്ഷ മങ്ങുകയാണ്.
ലാ ഗ്വെയ്റ തീരപ്രദേശത്തെയും തലസ്ഥാനമായ കാരക്കാസിനെയുമാണ് ദുരന്തം ഏറ്റവും രൂക്ഷമായി ബാധിച്ചത്. സർക്കാർ രക്ഷാസേനയുടെ അപര്യാപ്തത മൂലം പ്രദേശവാസികൾ സ്വന്തം കൈകൾ ഉപയോഗിച്ചാണ് പലയിടത്തും കോൺക്രീറ്റ് പാളികൾക്കും അവശിഷ്ടങ്ങൾക്കുമിടയിൽ തെരച്ചിൽ നടത്തുന്നത്. ഗതാഗതക്കുരുക്കും തകർന്ന റോഡുകളും രക്ഷാപ്രവർത്തനത്തെ ബാധിച്ചതോടെ ദുരന്തബാധിത മേഖലയിലേക്കുള്ള പ്രവേശനം അധികൃതർ കർശനമായി നിയന്ത്രിച്ചിട്ടുണ്ട്. ഇതുവരെ 3300ലധികം ആളുകൾക്ക് പരിക്കേറ്റതായും 243 പേരെ രക്ഷപ്പെടുത്തിയതായുമാണ് ഔദ്യോഗിക കണക്കുകൾ.
അവശിഷ്ടങ്ങൾക്കിടയിൽ കുടുങ്ങിയ ഓരോ ജീവനും തിരികെ ലഭിക്കുന്നത് ഒരു അത്ഭുതമാണെന്ന് വെനസ്വേലൻ നാഷണൽ അസംബ്ലി പ്രസിഡന്റ് ജോർജ് റോഡ്രിഗസ് പറഞ്ഞു. രക്ഷാപ്രവർത്തനങ്ങൾക്കായി വിദേശ രാജ്യങ്ങളിൽ നിന്നുള്ള 1600ഓളം വിദഗ്ധർ വെനസ്വേലയിൽ എത്തിയിട്ടുണ്ട്. ദുരന്തബാധിത പ്രദേശങ്ങളിൽ സൈന്യത്തെ വിന്യസിച്ചതായും ഭക്ഷണവും വെള്ളവും എത്തിച്ചു നൽകുന്നുണ്ടെന്നും ആക്ടിങ് പ്രസിഡന്റ് ഡെൽസി റോഡ്രിഗസ് അറിയിച്ചു. കൂടുതൽ ദുരിതാശ്വാസ സാമഗ്രികൾ എത്തിക്കുന്നതിനായി സൈമൺ ബൊളിവർ അന്താരാഷ്ട്ര വിമാനത്താവളത്തിലെ തകർന്ന റൺവേ അറ്റകുറ്റപ്പണികൾ പൂർത്തിയാക്കി തുറന്നിട്ടുണ്ട്.
വാർത്താവിനിമയ ബന്ധങ്ങളും ഇന്റർനെറ്റും താറുമാറായത് പ്രതിസന്ധി ഇരട്ടിയാക്കിയിട്ടുണ്ട്. തങ്ങളുടെ പ്രിയപ്പെട്ടവരെക്കുറിച്ച് യാതൊരു വിവരവുമില്ലാതെ ആയിരക്കണക്കിന് കുടുംബങ്ങളാണ് ഭീതിയോടെ കഴിയുന്നത്. ഇന്റർനാഷണൽ ഓർഗനൈസേഷൻ ഫോർ മൈഗ്രേഷന്റെ റിപ്പോർട്ട് പ്രകാരം രാജ്യത്തെ 6.7 ദശലക്ഷത്തോളം ആളുകളെയാണ് ഭൂചലനം ബാധിച്ചിരിക്കുന്നത്. 4.7 മുതൽ 8.7 ബില്യൺ ഡോളർ വരെയാണ് ഐക്യരാഷ്ട്രസഭ കണക്കാക്കുന്ന സാമ്പത്തിക നാശനഷ്ടം. ഇതിനിടെ ശനിയാഴ്ചയും 4.8 തീവ്രത രേഖപ്പെടുത്തിയ തുടർചലനം അനുഭവപ്പെട്ടത് ജനങ്ങളിൽ വീണ്ടും ഭീതി നിറച്ചിട്ടുണ്ട്. വീടുകളിലേക്ക് മടങ്ങാൻ പോലും ഭയന്ന് കഴിയുകയാണ് ഭൂരിഭാഗം പേരും.
0 Comments