ഗാന്ധിനഗർ: ഗുജറാത്ത് ഇന്റർനാഷണൽ ഫിനാൻസ് ടെക് സിറ്റിയുടെ (GIFT City) ആകർഷണീയത വർദ്ധിപ്പിക്കുന്നതിന്റെ ഭാഗമായി, അവിടെ വിളമ്പുന്ന വിദേശ മദ്യത്തിന്റെ നികുതിയിൽ സുപ്രധാന ഇളവുകൾ പ്രഖ്യാപിച്ച് സംസ്ഥാന സർക്കാർ. മദ്യത്തിന്മേലുള്ള മൂല്യവർദ്ധിത നികുതി (VAT) 65 ശതമാനത്തിൽ നിന്ന് 25 ശതമാനമായി ഒറ്റയടിക്ക് കുറച്ചു. കൂടാതെ ഓരോ 30 മില്ലിലിറ്റർ മദ്യത്തിനും അധികമായി ഈടാക്കിയിരുന്ന 240 രൂപയുടെ പ്രത്യേക ഫീസും സർക്കാർ പൂർണ്ണമായും ഒഴിവാക്കിയിട്ടുണ്ട്.
പുതിയ നികുതി ഇളവ് പ്രാബല്യത്തിൽ വരുന്നതോടെ ഗിഫ്റ്റ് സിറ്റിയിലെ മദ്യവിലയിൽ വൻ ഇടിവുണ്ടാകും. ഉദാഹരണത്തിന്, മെനുവിൽ 100 രൂപ അടിസ്ഥാന വിലയുള്ള 30 മില്ലി മദ്യത്തിന് പഴയ നികുതിയും ഫീസും ചേർത്ത് 561 രൂപയായിരുന്നു ഉപഭോക്താക്കൾ നൽകേണ്ടിയിരുന്നത്. പുതിയ നിരക്ക് പ്രകാരം ഇത് ഏകദേശം 125 രൂപയായി കുറയും. അതുപോലെ, 1,000 രൂപ അടിസ്ഥാന വിലയുള്ള മദ്യത്തിന് ഇനിമുതൽ 1,250 രൂപ നൽകിയാൽ മതിയാകും. നേരത്തെ ഇത് 2,046 രൂപയായിരുന്നു.
ഇന്ത്യയിലെ ആദ്യത്തെ ഇന്റർനാഷണൽ ഫിനാൻഷ്യൽ സർവീസസ് ഹബ്ബായ ഗിഫ്റ്റ് സിറ്റിയിൽ 'വൈൻ ആൻഡ് ഡൈൻ' (Wine and dine) പോളിസി ഗുജറാത്ത് സർക്കാർ നേരത്തെ പ്രഖ്യാപിച്ചിരുന്നു. ആഗോള നിക്ഷേപകർക്കും പ്രൊഫഷണലുകൾക്കും വിദേശ പ്രതിനിധികൾക്കും മികച്ചൊരു ബിസിനസ്സ് അന്തരീക്ഷം ഒരുക്കുക എന്നതാണ് ഇതിലൂടെ ലക്ഷ്യമിടുന്നത്. എന്നാൽ നിലവിലെ നികുതി ഘടന കാരണം മദ്യത്തിന് അമിതവില നൽകേണ്ടി വരുന്നത് ഈ മേഖലയുടെ ആഗോള സ്വീകാര്യതയെ ബാധിക്കുമെന്ന് വ്യവസായ പ്രതിനിധികൾ പലവട്ടം സർക്കാരിന്റെ ശ്രദ്ധയിൽപ്പെടുത്തിയിരുന്നു.
പുതിയ ഇളവുകൾ ഗിഫ്റ്റ് സിറ്റിയിലെ ഹോസ്പിറ്റാലിറ്റി മേഖലയിലും നിക്ഷേപങ്ങളിലും വലിയ കുതിപ്പുണ്ടാക്കുമെന്നാണ് വിലയിരുത്തൽ. അതേസമയം, ഗിഫ്റ്റ് സിറ്റിക്ക് പുറത്ത്, ഗുജറാത്തിന്റെ മറ്റ് ഭാഗങ്ങളിൽ നിലവിലുള്ള കർശന മദ്യനിരോധനം തുടർന്നും പ്രാബല്യത്തിലുണ്ടാകും.
0 Comments