തൃശൂർ: സംസ്ഥാനത്ത് വിവിധ മേഖലകളിൽ ജോലി ചെയ്യുന്ന തൊഴിലാളികൾക്ക് മിനിമം വേതനം ഉറപ്പാക്കുന്നതിനുള്ള നിയമം അടിയന്തര പ്രാധാന്യത്തോടെ പ്രഖ്യാപിക്കുന്നതിന് ആവശ്യമായ നടപടികൾ സംസ്ഥാന സർക്കാർ സ്വീകരിക്കുമെന്ന് തൊഴിൽ വകുപ്പ് മന്ത്രി ബിന്ദു കൃഷ്ണ അറിയിച്ചു.
തൃശ്ശൂരിലെ അമല, ജൂബിലി ആശുപത്രികളിൽ സമരം നടത്തുന്ന നഴ്സുമാരുടെ പ്രശ്നം പരിഹരിക്കുന്നതിനായി സംഘടിപ്പിച്ച ചർച്ചയിലാണ് മന്ത്രി ഇക്കാര്യം അറിയിച്ചത്. ആരോഗ്യ വകുപ്പ് മന്ത്രി കെ. മുരളീധരന്റെയും തൊഴിൽ വകുപ്പ് മന്ത്രി ബിന്ദു കൃഷ്ണയുടെയും നേതൃത്വത്തിലായിരുന്നു ചർച്ച. ചർച്ചയിൽ പങ്കെടുത്ത എല്ലാ വിഭാഗങ്ങളും തുറന്ന മനസ്സോടെയും മനുഷ്യത്വപരമായ സമീപനത്തോടെയും വിഷയത്തെ സമീപിക്കണമെന്ന് മന്ത്രി ബിന്ദു കൃഷ്ണ പറഞ്ഞു. സർക്കാരിന് സ്വകാര്യ ആശുപത്രികൾക്കെതിരായ നിലപാടല്ല ഉള്ളതെന്നും ആശുപത്രികളുടെ പ്രവർത്തനം അവതാളത്തിലാകരുതെന്നും ആരോഗ്യ വകുപ്പ് മന്ത്രി കെ. മുരളീധരൻ പറഞ്ഞു. നഴ്സുമാർക്ക് മാന്യമായ വേതനം ഉറപ്പാക്കി പ്രശ്നത്തിന് എത്രയും വേഗം പരിഹാരം കാണണമെന്ന് വിവിധ തൊഴിലാളി യൂണിയൻ പ്രതിനിധികൾ ആവശ്യപ്പെട്ടു. മിനിമം വേതന നിയമം സർക്കാർ എത്രയും വേഗം പ്രഖ്യാപിക്കണമെന്നും ആശുപത്രി മാനേജ്മെന്റ് പ്രതിനിധികൾ അഭിപ്രായപ്പെട്ടു.
ഇടക്കാല ബത്ത അനുവദിച്ചാൽ സമരം അവസാനിപ്പിക്കാൻ തയ്യാറാണെന്ന് യുഎൻഎ പ്രതിനിധികൾ യോഗത്തിൽ അറിയിച്ചു. ഉമ്മൻചാണ്ടി സർക്കാർ നഴ്സുമാർക്ക് അനുകൂലമായ നിലപാടാണ് സ്വീകരിച്ചിരുന്നതെന്നും തുടർന്നുവന്ന സർക്കാരുകളിൽ നിന്ന് അതുണ്ടായില്ലെന്നും അവർ ചൂണ്ടിക്കാട്ടി. എന്നാൽ, ഇടക്കാല ബത്ത അനുവദിക്കണമെന്ന സമരക്കാരുടെ ആവശ്യം ആശുപത്രി മാനേജ്മെന്റുകൾ അംഗീകരിച്ചില്ല.
മിനിമം വേതന നിയമം നടപ്പാക്കുന്നതിനുള്ള നടപടിക്രമങ്ങൾ അടിയന്തരമായി ആരംഭിക്കുമെന്നും ഇതിനായി അടുത്ത ദിവസം തന്നെ യോഗം ചേരുമെന്നും മന്ത്രി ബിന്ദു കൃഷ്ണ അറിയിച്ചു. സ്പെഷ്യൽ സെക്രട്ടറി ഷീബ ജോർജ് ഐഎഎസ്, ആരോഗ്യ മന്ത്രിയുടെ പേഴ്സണൽ സെക്രട്ടറി ഡോ. ഡി. സുനിൽ, അമല, ജൂബിലി ആശുപത്രി മാനേജ്മെന്റ് പ്രതിനിധികൾ, യുഎൻഎ ഭാരവാഹികൾ, വിവിധ തൊഴിലാളി യൂണിയൻ പ്രതിനിധികൾ എന്നിവർ ചർച്ചയിൽ പങ്കെടുത്തു.
0 Comments