അന്വറിന്റെ വെളിപ്പെടുത്തലില് ഇടപെട്ട് ഗവര്ണ്ണര്; ഫോണ് ചോര്ത്തലില് മുഖ്യമന്ത്രിയോട് റിപ്പോര്ട്ട് തേടി.
തിരു.: മുഖ്യമന്ത്രിയുടെയും മന്ത്രിമാരുടെയും എംഎല്എമാർ ഉള്പ്പെടയുള്ളവരുടെയും ഫോണ് എഡിജിപി എം.ആര്. അജിത് കുമാറിന്റെ നേതൃത്വത്തിലുള്ള സംഘം ചോര്ത്തിയെന്ന പി.വി. അന്വര് എംഎല്എയുടെ വെളിപ്പെടുത്തലില് റിപ്പോര്ട്ട് തേടി ഗവര്ണ്ണർ ആരിഫ് മുഹമ്മദ് ഖാന്. ഇതുസംബന്ധിച്ച് മുഖ്യമന്ത്രിക്ക് കത്ത് നല്കി. അതീവ ഗൗരവത്തോടെയാണ് ആരോപണത്തെ കാണുന്നതെന്നും ഗുരുതരമായ നിയമലംഘനമാണ് നടന്നതെന്നും ഗവര്ണ്ണര് കത്തില് വ്യക്തമാക്കി.
എഡിജിപിയുടെ നേതൃത്വത്തിലുള്ള ഒരു സംഘം മന്ത്രിമാർ ഉള്പ്പെടയുള്ളവരുടെ ഫോണുകള് ചോര്ത്തുന്നുവെന്ന കാര്യങ്ങള് അതീവ ഗൗരവമുള്ളതാണ്. സംസ്ഥാനത്ത് വ്യാപകമായി ഫോണ് ചോര്ത്തുന്നുവെന്ന് ആരോപിക്കുന്ന എംഎല്എ തന്നെ ചിലരുടെ ഫോണ് ചോര്ത്തിയെന്ന് വെളിപ്പെടുത്തുന്ന ശബ്ദരേഖകള് പുറത്തു വിടുന്നു. ഇത് നിയമലംഘനമാണെന്നും സുപ്രീം കോടതിയുടെ നിര്ദ്ദേശങ്ങള്ക്ക് വിരുദ്ധമായ കാര്യങ്ങളാണെന്നും ആരിഫ് മുഹമ്മദ് ഖാന് പറഞ്ഞു.
നിയമലംഘകരും നിയമപാലകരും തമ്മില് യോജിച്ച് പ്രവര്ത്തിക്കുന്ന സാഹചര്യം സംസ്ഥാനത്ത് നിലനില്ക്കുന്നു. ഇത് ജനങ്ങള്ക്ക് സംശയമുണ്ടാക്കുമെന്നും സംസ്ഥാന ഭരണത്തെക്കുറിച്ച് ചോദ്യങ്ങള് ഉയര്ത്തുകയും ചെയ്യുന്നു. ഇത് ഒരിക്കലും അംഗീകരിക്കാന് കഴിയില്ല. ഇതേക്കുറിച്ച് അടിയന്തരമായി റിപ്പോര്ട്ട് നല്കണമെന്നും ഗവര്ണ്ണര് പറഞ്ഞു. ഇക്കാര്യത്തില് എന്തു നടപടികള് സ്വീകരിച്ചുവെന്നും, അടിയന്തരമായി നടപടികള് സ്വീകരിക്കേണ്ട ആവശ്യകതയും ചൂണ്ടിക്കാണിച്ചാണ് ഗവര്ണ്ണര് കത്ത് നല്കിയത്.
0 Comments