സംസ്ഥാനത്ത് വിവിധ ജില്ലകളില് കള്ളവോട്ട് നടന്നെന്ന് പരാതി.
ലോക്സഭാ തെരഞ്ഞെടുപ്പിൽ നിരവധി സ്ഥലത്ത് കള്ളവോട്ട് ചെയ്തതായി പരാതി. 16 കള്ളവോട്ട് പരാതികളാണ് വിവിധ ജില്ലകളില് നിന്നായി ഉയർന്നത്.
പത്തനംതിട്ട മണ്ഡലത്തില് മാത്രം ഏഴ് കള്ളവോട്ട് പരാതികളാണ് ഉണ്ടായത്. ഇടുക്കിയില് ഇരട്ടവോട്ട് ചെയ്യാൻ ശ്രമിച്ചത് രണ്ട് പേരെ പോളിംഗ് ഉദ്യോഗസ്ഥർ തടഞ്ഞു. പത്തനംതിട്ടയില് രാവിലെ മുതല് വിവിധ സ്ഥലങ്ങളില് കള്ളവോട്ട് പരാതി ഉയർന്നു. ആനപ്പാറയില് ഹസ്സൻ ബീവി വോട്ട് ചെയ്യാനെത്തിയപ്പോള് മറ്റാരോ വോട്ട് ചെയ്തിരുന്നു. അടൂർ മണക്കാലയില് ലാലി യോഹന്നാന്റെ വോട്ടാണ് മറ്റാരോ ചെയ്തത്. സംഭവത്തില് യുഡിഎഫ് സ്ഥാനാർത്ഥി ആന്റോ ആന്റണി പ്രതിഷേധിച്ചു. തിരുവല്ല, ഓമല്ലൂർ, അടൂർ, വെട്ടൂർ എന്നിവിടങ്ങളില് നിന്നും കള്ളവോട്ട് പരാതി ഉയർന്നു.
ഇടുക്കിയില് ഖജനാപ്പറയില് മുരുകൻ മൂക്കൻ വോട്ട് ചെയ്യാനെത്തിയപ്പോള് മറ്റൊരാള് വോട്ട് രേഖപ്പെടുത്തിയതായി കണ്ടു. കരിമണ്ണൂരില് രണ്ട് കള്ളവോട്ട് പരാതികളാണ് ഉയർന്നത്. കരിമണ്ണൂർ സ്വദേശികളായ ജെസ്സി ജോസ്, ഷാജു മാത്യു എന്നിവരുടെ വോട്ടാണ് മറ്റാരോ ചെയ്തത്. ഇടുക്കി ചക്കുപള്ളത്ത് കള്ളവോട്ട് ചെയ്യാനെത്തിയ സിപിഎം ബ്രാഞ്ച് സെക്രട്ടറിയെ തടഞ്ഞു. ആറാം മൈല് സ്വദേശി ബിജുവിനെയാണ് യുഡിഎഫ് ബൂത്ത് ഏജന്റ്മാർ പിടികൂടിയത്.
തിരുവനന്തപുരത്ത് കുന്നുകുഴിയില് രണ്ട് കള്ളവോട്ട് പരാതികളാണ് ഉണ്ടായത്. രാജേഷ്, തങ്കപ്പൻ എന്നിവരുടെ വോട്ടുകള് മറ്റൊരോ ചെയ്തതായാണ് പരാതി. മണക്കാട് സ്കൂളിലെ പി. രാജേഷിന്റെ വോട്ടും മറ്റാരോ ചെയ്തു. ആറ്റിങ്ങല് മണ്ഡലത്തില് പോത്തൻകോട് മേരിമാതാ സ്കൂളില് ലളിതാമ്മയുടെ വോട്ടും മറ്റാരോ ചെയ്തു. മലപ്പുറത്തെ പെരിന്തല്മണ്ണയിലും തൃശൂർ ഒല്ലൂരും കള്ളവോട്ട് പരാതി ഉയര്ന്നു.
0 Comments