യുവാവിനെ തട്ടിക്കൊണ്ടു പോയി വെട്ടിക്കൊല്ലാൻ ശ്രമം: ഗുണ്ടാ സംഘത്തിലെ മൂന്ന് പേര് പിടിയിൽ.
കായംകുളം: യുവാവിനെ തട്ടിക്കൊണ്ടു പോയി വെട്ടിക്കൊല്ലാൻ ശ്രമിച്ച ഗുണ്ടാ സംഘത്തിലെ മൂന്ന് പേര് പൊലീസ് പിടിയിലായി. യുവാവിനെ ആക്രമിച്ച കൃഷ്ണപുരം സ്വദേശികളായ അമല് ചിന്തു, അഭിമന്യു, അനൂപ് ശങ്കര് എന്നിവരാണ് പിടിയിലായത്. റെയിൽവേ ക്രോസിലിട്ട് ആണ് ഇവർ യുവാവിനെ വെട്ടിക്കൊല്ലാൻ ശ്രമിച്ചത്.
അരുണ് പ്രസാദ് എന്ന യുവാവിനെയാണ് നാല് പേര് ചേര്ന്ന് തട്ടിക്കൊണ്ടുപോയത്. വെള്ളിയാഴ്ച നടന്ന സംഭവങ്ങളാണ് ഗുണ്ടാ സംഘത്തിന്റെ ആക്രമത്തിലേക്ക് കലാശിച്ചത്. വെള്ളിയാഴ്ച രാത്രി 11 മണിക്ക് ഒരു സംഘം പൊലീസ്, സിവില് ഡ്രസ്സില് കായംകുളത്തെ ഹോട്ടലില് ചായ കുടിക്കുകയായിരുന്നു. ഇതിനിടെ ഹോട്ടലിന് പുറത്ത് ഒരു യുവാവ് സിഗരറ്റ് വലിച്ചത് പൊലീസുകാര് ചോദ്യം ചെയ്തു. പൊലീസുകാർ ആണെന്ന് മനസിലാക്കാതെ യുവാവും സുഹൃത്തുക്കളും പൊലീസുകാരുമായി വാക്കുതര്ക്കത്തില് ഏര്പ്പെടുകയും അടിപിടിയില് കലാശിക്കുകയുമായിരുന്നു. ഇതില് ഒരാളെ പൊലീസുകാര് സ്റ്റേഷനിലേക്ക് കൊണ്ടുപോയി. എന്നാല്, സംഘര്ഷത്തിനിടെ ഗുണ്ടാ നേതാവിന്റെ ഫോണ് നഷ്ടപ്പെട്ടു. ഈ ഫോണ് പൊലീസില് ഏല്പ്പിച്ചത് മര്ദ്ദനമേറ്റ അരുണ് പ്രസാദായിരുന്നു. ഈ വൈരാഗ്യത്തിലാണ് യുവാവിനെ തട്ടിക്കൊണ്ടു പോയത്. യുവാവിനെ മര്ദ്ദിക്കുന്നത് ഗുണ്ടകള് തന്നെ മൊബൈലില് പകര്ത്തിയിരുന്നു. ഈ ദൃശ്യങ്ങളും പുറത്ത് വന്നിട്ടുണ്ട്.
0 Comments