ബിലീവേഴ്സ് ഈസ്റ്റേണ് ചര്ച്ച് തിരുവനന്തപുരം ഭദ്രാസനാദ്ധ്യക്ഷന് മാത്യൂസ് മാര് സില്വാനിയോസിന്റെ പരാതിയിലാണ് കേസ്. ബിലീവേഴ്സ് ചര്ച്ച് പരമാദ്ധ്യക്ഷന് മോര് അത്താനാസിയോസ് യോഹാന് പ്രഥമന്റെ അപകട മരണത്തിന് പിന്നാലെ ഐടുഐ ചാനലിലുടെ മേയ് ഒമ്പത്, 21 തീയതികളില് സിഇഓ ആയ സുനില് മാത്യു വ്യാജവാര്ത്ത പ്രചരിപ്പിച്ചുവെന്നും മൂന്നാം പ്രതിയായ മാര്ക്കറ്റിങ് മാനേജര് ചാനലിന് വന് തുകയ്ക്ക് പരസ്യം ലഭിച്ചില്ലെങ്കില് തുടര്വാര്ത്തകള് നല്കുമെന്ന് ഭീഷണിപ്പെടുത്തിയെന്നും മാര് സില്വാനിയോസിന്റെ പരാതിയില് പറയുന്നു.
ബിലീവേഴ്സ് ചര്ച്ച് പരമാദ്ധ്യക്ഷന്റേത് അപകട മരണമല്ലെന്നും കൊലപ്പെടുത്തിയത് ആണെന്നും പറഞ്ഞ് നല്കിയ വ്യാജവാര്ത്ത വിശ്വാസികള്ക്കിടയില് കലാപം ലക്ഷ്യമിട്ടുള്ളതാണ്. പരസ്യം നല്കിയില്ലെങ്കില് ഇത്തരം വാര്ത്തകള് തുടരുമെന്ന മൂന്നാം പ്രതിയുടെ ഭീഷണി പണം തട്ടാന് വേണ്ടിയുള്ളതാണ്. നേരത്തേയും ഇതേ രീതിയില് പണം തട്ടാന് ഇയാള് ശ്രമിച്ചിരുന്നു. പരമാദ്ധ്യക്ഷന്റെ മരണത്തെ തുടര്ന്ന് നിരവധി വ്യാജവാര്ത്തകള് ഇയാള് സൃഷ്ടിച്ചിരുന്നുവെന്ന് മാര് സില്വാനിയോസ് മെത്രാപ്പോലീത്ത പറഞ്ഞു. സുനില് മാത്യുവിനെതിരേ സമാന രീതിയില് പ്രവര്ത്തിച്ചതിന് അഞ്ചോളം കേസുകള് മ്യൂസിയം, മാവേലിക്കര, പോത്തുകല്, വട്ടിയൂര്ക്കാവ്, മണ്ണന്തല സ്റ്റേഷനുകളിലായി നിലവിലുണ്ട്. സഭയുടെ വിവിധ പദവികള് വഹിക്കുന്നവര്ക്കെതിരേ അപകീര്ത്തികരമായ പരാമര്ശം നടത്തിയതിന് കോടതി മുഖേനെയും നിയമനടപടി സ്വീകരിച്ചു വരുകയാണ്. ഇത് വിശ്വാസികള്ക്കിടയില് ഭിന്നിപ്പുണ്ടാക്കാന് ലക്ഷ്യമിട്ടുള്ളതായിരുന്നുവെന്ന് മാത്യൂസ് മാര് സില്വാനിയോസ് പറഞ്ഞു.
0 Comments